ENSHEIM Homepage

Mundart-Sagen-Wanderungen im Oktober 2003

Vorgetragene Sagen (7) - Mundart-Version

De Buur unn de Schadds

Im alde Schloss uffem Grooße Schdiwwel bäi Dingmadd honn frieha Ridda geunnadd, die nurre vunn Niggullichkääde gelääbd honn unn voor dänne sich all Lied gefärchd honn. Alses medd dänne iehre Däiweleräie imma wuschda woor isch, hadd ma die Räiwa ussgehaab unn iehne de Kobb erunnagemach unn iehr Burch hadd ma abgerobbd. Awwa die gonse Schädds hadd ma sällmools nidd gefunn unn so läid häid noch alles innewänsich im Bärch, unn beese Gääschda dunn druff uffpasse.

Voor gons viele Johre hadd emool e richa Buur, däär wo nurre imma onn de Mummes gedänkgd hadd, vasuuchd, dänne Schadds se hewwe. In da Naachd – ’s waa gons duschda – halla gons ellään owwe uff da Heh vumm Schdiwwel gegrab(d). Er hadd sich aarich vabloddse misse, awwa donn halla ächd e Keschd uss Iese gefunn. Er hadd se gons fräigeleed unn schunn isch de Deggel uffgeschbrung unn blongges Gold, dass wo aarich geglänsd hadd, ischem ins Au geschdoch. Voor ludda Fräid hadd däär Buur gons haad gegresch, unn donn hadds grusslich gebolladd, unn de Schadds isch willa mierniggs, dierniggs im Bollem va-schwunn. Ussadämm hadd irchendjemond dämm Schaddsgrääwa so vamässe onn de Bagge geschlaa, dassa halwa dämmsch waa unn hiengefall isch.

Wälls morjens so kiehl waa, ischa willa zu sich kumm. Alsa driwwa nohgedängkd hadd, wass eijendlich passierd isch, halla aachd gedoon, dass vunn sinna Ärwedd midde in da Naachd niggs, awwa aa gaa niggs meh se siehn waa. Onn dämm Plädds, woa dass Loch gegrab hadd, halla nurre noch hunnsgewehnlicha Waldbollem gesiehn, medd Laab unn Muus owwedruff. Sinn Wärgzäich, onn dämm noch nidd e Bousche Bollem gehungk hadd, hadd omme Boom gons näggschd debäi degähnggelehnd.

Alsa noch imma hien unn häär, voor unn srigg iwwaleed hadd, halla iwwa sich e haada Flichelschlaach gehärrd unn vunneme Boom erunna hadd jemond so grusslich unn wuschd gelachd, dassem dass durch Maarich unn Bään gong isch. Dodaal vaschrogg ischa de Bärch enunnageweddsd oohne e Paus se mache, sinn Wärgzäich ischem nohgefloo und ma hadds e paa Daa schbääla omm Fuuß vumm Bärch gefunn. De Buur sälwa hadd hennahäär schwäär Fiewa gridd, hadd wuchelong uffem Ribbschdrongk gelää unn hädd umms Känne de Leffel abgänn. Alsa willa gudd waa, waara e gons onnarra als frieha unn waa medd dämm sefriele, wassa gehaad hadd.

eMail an den Webmaster

Last update: 04.11.2003