ENSHEIM Homepage

Mundart-Sagen-Wanderungen im Oktober 2003

Vorgetragene Sagen (6) - Mundart-Version

De uunhäämliche Jäächa vumm Schdiwwel

Ums Johr achzehhunnadd|seggse|fuchzich honn zwei Hidde| arweida känn Schichd gehaad. Dässwää honnse ussgemach, in de Wald omm Schdiwwel se gehn fa e Woon voll durres Hols se mache. Medd eme Vawonde honnse e Zidd ussgemach, woa se meddeme Oggse|geschbonn hadd abholle solle.

Donn sinnse in de Schdiwwela Wald unn sinn omm eschd-liche Abhong, schdigga hunnadd Schridd vumm heggschde Punggd ewägg, uffe durra Eiche|schdurdse geschdooßd, däär wo noch uff da Wurdsel geschdonn hadd unn uss dämma beschdimmd e baa Määda Hols hädd erussgrien kinne. Sie honn aa glich oongefong, dänne Schdurdse, vunn dämm ’s owwarre Schdigg schunn abgebroch unn furdgeschaffd woor waa, umsemache. Vunn allezwei Sidde honnse druff lossgehau, awwa obwoohl iehre Äggsd gulle Schnille gehaad honn, isch noch nidd änna Schlaach ins Hols eninngong, unn unna da Wurdsel vunn dämm Schdomm hadds bäi jeelem Schlaach gerumbeld unn gebolladd, als gähng de gonse Schdiwwel uff äämool sesomme bräche. Donn honnse sich aarich gefärchd, de Ongschdschwääß ischne in digge Trobbe die Schdier erunnagelaaf unn sie honn zurr sälb Zidd uffgehärrd uff dänne Schdomm innseschloon unn honn sich gons vawunnadd unn vagellschdadd oongeluud. Uff äämool sinnse e alda Jäächa vooroon sich schdehn. Olägg, wass honnse sich gefärchd! So dabba honn die zwei gaa nidd nohdängge kinne, wie die denoh abgehau sinn! Wie e geheddsdes Reh sinnse de Bärch enunnagerännd unn honn unne ’s Fuhrwärg getroff, dass wo’se beschdelld gehaad honn. Dass honnse umwänne gelass, donn sinnse dabba hämm, oohne Hols unn sie honn sich geschwoor, iehr Läbbdaa uffem Schdiwwel känn Schierhols meh se raffe – unn doodroon honnse sich bis häid gehall.

eMail an den Webmaster

Last update: 04.11.2003