Mundart-Sagen-Wanderung II am 31.10.2003
Die Streckenführung:
7. De Schdiwwel unn de Riesedisch.
· De Schdiwwel (uffem Foddo rächdahond) hääschd aa „Zwei|schbidds“, awwa in de Ensemma Wääsdimma – ’s erschdemool schunn 1538 – hadd imma schunn „Schdiwwel“ geschdonn. Er sidd hald uss wie e Schdiwwel, däär wo uffem Kobb schdedd – unn doodevoon halla sinn Noome... Irgendwonn isch de Schdiel ussgeweschd unn donn burdseld die Sohl erunna ins Daal, awwa dass wärre mier nimmeh erlääwe...
(Foto: Wanderhans -> www.wandernmithans.de)
· Dass doo isch de Riesedisch (uffem Foddo linggahond). Doo soll de Gräidsmonn – dass isch däär Ries, däär wo im Buuch aa voorkimmd – imma sinne Gefongene gewomschd honn. Er isch gudd 3 Määla hoch, schdigga 6 Määla im Umfong. De Kräma hadd fa meechlich gehall, dass däär Brogge usseme viel greeßere Fels erussgehau woor wär, wäll die Sidde zimmlich ääwe sinn... awwa dass konnich ma nidd gudd voorschdelle...
· Genauso gedänggd hadd aa e onnarra Forscha vunn frieha, de Weewa Jochhonn: däär hadd gemännd, doo voore wär de Schdäänbruch fa doo henne die Burch gewään – unn de Schdiwwel unn de Riesedisch hällese sällnmools äggsdra schdeh gelass! Awwa dass konnich ma noch winnicha voorschdelle....
De Heimaadforscha Frank, vunn dämm joo schunn die Redd waa, männd aa, dass die zwei Brogge doo usseme Mordsfelse, däär wo iwwa dass gonse Pladdoo doo gong isch, erussgehau woor wäre – uss kuldische Zwägge. 7.000 m³ Schdään hädd ma sällmools furdschaffe misse, awwa wämma omm Schdiwwel erunnaluud, sidd ma niggs. De Herr Frank männd widdschda, de Schdiwwel wäär eichendlich e Hohneschdään; uffem Absadds hädd frieha noch e klääna Schdään gelää unn däär wär medda Zidd erunnagefall. De Schwons vunn dämm Hohn gähng genau uff de Schbelleschdään noh Rändrisch wiese. Unn genau iwwam Kobb gähng die Sunn uffgehn, wänn’s Friehjohr oonfingd! Doo missd ma ächd mool luh gehn, olla? De Hohn waa bäi de Kelde e wichdiches Fruchdbaakäädssymbol – unn wämma sich häid die Kirchtirm oonluud, donn sidd ma owwe mänschdens e Wällahohn – dass isch awwa bäi de Kaddoligge eichendlich e Simbol fa die Ufferstehung.
Top | Sawa-Themenübersicht | Tageswanderung | Inhaltsverzeichnis | Startseite | Nächstes Sawa-Thema
© Paul Glass 1997 - 2003ff
Last update: 03.11.2003
